讲到广州嘅步行街，
你会谂起边一条？
係升级之后嘅“网红”北京路，
(资料图片仅供参考)
抑或被日渐遗忘嘅上下九？
相信不少朋友仔，
都好耐冇去行上下九啦，
今期可乐君带大家，
一齐探下呢位“旧朋友”！
上下九竟然係95后？
上下九，
位于人民中路与宝华路之间，
全称为“上下九商业步行街”。
虽然早在6世纪20年代，
呢一带已经係商业聚集区，
但我哋熟悉嘅上下九步行街，
喺1995年9月30日先正式开通！
（有冇人同一日生日呢？）
从95年开始计嘅话，
上下九其实都好后生，
年纪同大家咁上下，
有冇好surprise？
绵延千米的骑楼街！
上下九步行街嘅骑楼连绵千米，
呢D建筑始建于清代，
设计上融合咗南欧建筑特色、
中国北方满洲式装饰，
以及西关传统建筑风格，
适应南方炎热多雨嘅气候。
唔止有观赏价值，
仲非常实用，
骑楼可以为大家遮阳挡雨，
方便商户、顾客喺任何天气下，
进行商业活动！
不过呢度始终係户外，
如今大家行惯咗大商场叹冷气，
天口㷫嘅时候嚟上下九，
可能就冇咁爽啦！
学生时代的平价购物胜地！
细个嗰阵，
边有咁多大型商场，
行街买嘢都係要捐窿捐罅！
东急、女人街......
嗰D蜿蜒曲折嘅走道，
两旁细细间又多货嘅铺头，
行到笃发觉冇路兜转头，
回首望去人头涌涌。
当其时，
人与人之间真係好close，
前面靓女条马尾，
永远会劈中你块面！
如果你曾经逼过上下九D商场仔，
所谓“地狱3号线”又算D咩？！
当然，
而家装修比较新嘅商场，
地方都阔落咗好多，
不过嚟行街嘅人，
似乎就冇预期咁多。
可能个个都钟意追求新欢，
例如话旁边恩宁路嘅永庆坊。
面对此情此景，
恐怕上下九都要问一句，
“所以爱会消失对不对？”
不变的怀旧美食天堂！
虽然熟悉上下九嘅朋友仔，
觉得佢冇咩好行，
都係旅客钟意去多D。
不过有时去食下嘢，
回味一下传统风味都唔错噶！
上下九一带，
集中咗好多老字号，
比如广州酒家、莲香楼，
以及陶陶居！
仲有林林牛杂、南信双皮奶等
各式街头甜品小食！
转个弯到宝华路，
老字号更加密集！
陈添记
鱼皮爱好者必吃之选！
文记壹心鸡
每逢佳节
门前必定排长龙买鸡！
顺记冰室
行街行到攰
食个雪糕hea一hea
宝华面店
肚饿就渌碗面食下啦！
长乐腊味
秋风起食腊味，
得闲DIY煲腊味饭都唔错！
美美
炸春卷、酿辣椒......
经典味道你要试！
除此之外，
呢度仲有不少怀旧服装店，
以及报纸摊，
可以感受老广市井风情！
讲到呢度，
有冇勾起你同上下九嘅回忆？
你会有兴趣嚟行下吗？
